الكليفر ليش كثير يعتبرونه اسهل أداة لتحضير القهوة؟
اذا انت في عالم القهوة المختصة او ودك تدخل عالم القهوة المختصة لكن تحس إن أدوات مثل الـ V60 تحتاج تركيز وخبرة فالكليفر ممكن يكون افضل بداية لك
الكليفر يجمع بين طريقتين للتحضير في اداة وحدة تخلي البن يتنقع مع الموية اول وبعدها تنزل القهوة عن طريق الفلتر الورقي هذي الطريقة تعطي استخلاص ثابت وكوب متوازن بدون ما تحتاج تتقن طريقة الصب أو توقيت الصبة
إيش يفرق الكليفر عن باقي أدوات التحضير؟
اكبر فرق إن الكليفر ما يعتمد بشكل كبير على مهارتك. في الـ V60 مثلًا، اي تغيير بسيط في طريقة الصبة أو سرعة نزول الموية ممكن يغير طعم القهوة أما الكليفر فهو مايحتاج مثل هذا التركيز، ويعطيك نتيجة ممتازة حتى لو كانت اول مرة تحضر فيها.
كمان الكليفر يجمع بين مميزات التنقيع والتقطير، فتطلع القهوة بإيحاء واضحة وحلاوة اعلى، وقوام اعلى ، بدون الرواسب اللي تشوفها في بعض أدوات التقنيع
مين يناسبه الكليفر؟
اذا كنت :
• توك داخل عالم القهوة المختصة
• تبغى تحضير سهل بدون تعقيد
• تدور على نتيجة ثابتة كل مرة
• او حتى محترف وتبغى كوب جميل وهادي
فالكليفر يعتبر خيار ممتاز.
هل الكليفر أفضل من الـ V60؟
ما فيه اداة أفضل من الثانية لكن لكل وحدة استخدام مختلف
إذا تستمتع بالتحكم في كل تفاصيل التحضير وتحب تجربة ايحاءات مختلفة فالـ V60 بيناسبك اكثر. اما إذا هدفك كوب قهوة متوازن، سهل التحضير ويطلع بنفس الجودة كل مرة فالكليفر يتفوق في هذي النقطة.
الخلاصة
الكليفر من اكثر أدوات التحضير اللي تجمع بين السهولة وجودة النتيجة. ما يحتاج خبرة كبيرة، ويعطيك كوب نظيف ومتوازن مع إبراز حلاوة البن، عشان كذا يعتبر من افضل الخيارات للمبتدئين وحتى كثير من المحترفين يستخدمونه لما يبغون تحضير سريع وثابت